शहादा नगरपालिका कचर्यातूनही करणार कमाई; आधी ओला–सुका कचर्याचे वर्गीकरण अन् मग होणार सेंद्रीय खताची निर्मिती
शहादा (सलाउद्दीन लोहार / नंदुरबार पोस्ट वृत्तसेवा) : शहादा शहरातील वाढत्या घनकचऱ्याच्या समस्येवर उपाय शोधताना शहादा नगरपालिकेने एक महत्त्वपूर्ण आणि दूरदृष्टीचा निर्णय घेतला आहे. आता शहरातून दररोज गोळा होणाऱ्या ओल्या व सुका कचऱ्याचे वैज्ञानिक पद्धतीने वर्गीकरण करून त्यापासून सेंद्रिय खत निर्मिती केली जाणार आहे. या उपक्रमामुळे पर्यावरण संवर्धनासोबतच पालिकेच्या आर्थिक तिजोरीलाही मोठा हातभार लागणार आहे.
नगराध्यक्ष अभिजीत पाटील यांनी दिलेल्या माहितीनुसार, सध्या शहादा शहरातील सर्व प्रकारचा कचरा एकत्रितपणे डम्पिंग ग्राउंडवर टाकला जातो. त्यामुळे कचऱ्याचे व्यवस्थापन कठीण होत असून पर्यावरणावरही त्याचा विपरीत परिणाम दिसून येतो. ही समस्या लक्षात घेऊन पालिकेने घनकचऱ्याचे स्त्रोतावरच वर्गीकरण (ओला व सुका) करण्याचा निर्णय घेतला आहे. यासाठी नागरिकांमध्ये जनजागृती मोहीम राबवली जाणार असून घराघरातून वेगळा कचरा संकलित करण्यावर भर दिला जाणार आहे.
या योजनेअंतर्गत ओल्या कचऱ्यापासून सेंद्रिय खत तयार केले जाईल. हे खत स्थानिक शेतकऱ्यांसाठी अत्यंत उपयुक्त ठरणार असून रासायनिक खतांवरील अवलंबित्व कमी करण्यास मदत होईल. तसेच तयार होणाऱ्या खताच्या विक्रीतून पालिकेला उत्पन्न मिळणार आहे, ज्यामुळे आर्थिकदृष्ट्या स्वावलंबनाच्या दिशेने एक पाऊल पुढे टाकले जाईल.
दरम्यान, शहरातील डम्पिंग ग्राउंडचा प्रश्न सध्या न्यायालयात प्रलंबित असल्यामुळे या प्रकल्पाच्या अंमलबजावणीत काहीसा विलंब होण्याची शक्यता वर्तवली जात आहे. तरीदेखील पालिकेने या प्रकल्पासाठी टेंडर प्रक्रिया सुरू केली असून, लवकरच प्रत्यक्ष कामाला सुरुवात होणार असल्याचे संकेत मिळत आहेत.
विशेष म्हणजे, हा प्रकल्प यशस्वी झाल्यास शहादा शहर ‘कचऱ्यापासून संपत्ती’ या संकल्पनेचा आदर्श निर्माण करू शकते. पर्यावरणपूरक शहराच्या दिशेने टाकलेले हे पाऊल नागरिकांच्या सक्रिय सहभागाशिवाय पूर्ण होऊ शकत नाही. त्यामुळे नागरिकांनीही ओला व सुका कचरा वेगळा देण्याचे भान ठेवणे आवश्यक आहे.
एकूणच, कचऱ्याचे योग्य व्यवस्थापन करताना त्यातून उत्पन्नाचा नवा स्रोत निर्माण करण्याचा शहादा नगरपालिकेचा हा उपक्रम भविष्यात शहराच्या विकासाला गती देणारा ठरण्याची शक्यता आहे.
